पिंपरी-चिंचवड महानगरपालिकेच्या वतीने 'वेस्ट टू वंडर' स्पर्धेचे आयोजन

पिंपरी-चिंचवड महानगरपालिकेच्या वतीने 'वेस्ट टू वंडर' स्पर्धेचे आयोजन 

कचऱ्याच्या ठिकाणांचे नाविन्यपूर्ण व आकर्षक रुपांतर करण्यावर दिला जाणार विशेष भर 

पिंपरी, ता. २० - जागतिक पुनर्वापर दिनाचे औचित्य साधून पिंपरी-चिंचवड महापालिकेच्या वतीने क्षेत्रीय कार्यालयांसाठी लोकसहभागातून ‘वेस्ट टू वंडर’ या अभिनव स्पर्धेचे आयोजन करण्यात आले आहे. या स्पर्धेत कचऱ्याच्या ठिकाणांचे नाविन्यपूर्ण व आकर्षक रुपांतर करण्यावर विशेष भर देण्यात आला आहे. त्यामुळे शहरात सौंदर्यीकरण होऊन नागरिकांमध्ये स्वच्छतेबाबत जागरुकता वाढण्यास मदत होणार आहे.

महापालिकेच्या आठही क्षेत्रीय कार्यालयांअंतर्गत ३२ प्रभागांमध्ये ही स्पर्धा आयोजित करण्यात आली असून, शहर स्वच्छतेवर भर देतानाच वस्तूंचा सुयोग्य पुनर्वापर करून कलात्मकता जोपासण्याचा दुहेरी उद्देश या उपक्रमामागे आहे. टाकाऊ वस्तूंना नवसंजीवनी देत स्वच्छतेसोबत सौंदर्याची अनोखी सांगड घालण्याचा प्रयत्न यामधून करण्यात येत आहे. या स्पर्धेमुळे संपूर्ण शहरात स्वच्छते बरोबर कलेचा आकर्षक व सर्जनशील आविष्कार पाहायला मिळणार आहे. प्रत्येक प्रभागातून टाकाऊ वस्तूंचे रूपांतर कल्पक कलाकृतींमध्ये करुन पर्यावरण संवर्धनाचा प्रभावी संदेश दिला जाणार आहे.

महापौर रवी लांडगे, उपमहापौर शर्मिला बाबर, आयुक्त डॉ. विजय सूर्यवंशी, अतिरिक्त आयुक्त विजयकुमार खोराटे यांच्या मार्गदर्शनाखाली, तसेच उपआयुक्त डॉ. प्रदीप ठेंगल व सहाय्यक आयुक्त किरणकुमार मोरे यांच्या अधिपत्याखाली आरोग्य विभागामार्फत ही स्पर्धा राबविण्यात येत आहे. वेस्ट टू वंडर हा विभागाचा हा उपक्रम शहराच्या सौंदर्यात भर घालणारा आणि वसुंधरापूरक जीवनशैलीस चालना देणारा ठरेल, असा विश्वास किरणकुमार मोरे यांनी व्यक्त केला.

स्पर्धेत सहभागी होण्यासाठी खालील लिंकवर नोंदणी करणे आवश्यक असून, नोंदणीची अंतिम मुदत २४ मार्च २०२६ रोजी, दुपारी १२ वाजेपर्यंत आहे.

लिंक : https://forms.gle/LsxTPH6axEaak4LW7⁠�

प्रेरणादायी उपक्रम 

वेस्ट टू वंडर स्पर्धेमुळे नागरिकांमध्ये स्वच्छतेबरोबरच सर्जनशीलतेची जाणीव निर्माण होईल. टाकाऊ वस्तूंचा पुनर्वापर करून शहर अधिक सुंदर आणि वसुंधरापूरक बनविण्यासाठी हा उपक्रम निश्चितच प्रेरणादायी ठरेल.

- रवी लांडगे, महापौर, पिंपरी चिंचवड महापालिका 

नागरिकांमध्ये पर्यावरणपूरक सवयी रुजवण्याचा प्रयत्न 

वेस्ट टू वंडर हा उपक्रम केवळ स्वच्छतेपुरता मर्यादित नसून, नागरिकांमध्ये वसुंधरापूरक सवयी रुजवण्याचा एक महत्त्वाचा प्रयत्न आहे. कचरा व्यवस्थापन आणि पुनर्वापर याबाबत जनजागृती वाढवून शहर अधिक स्वच्छ व शाश्वत करण्यासाठी ही स्पर्धा उपयुक्त ठरेल.

- डॉ. विजय सूर्यवंशी, आयुक्त,  पिंपरी चिंचवड महापालिका