पिंपळे निलखमध्ये पार्किंगमधून ॲक्टिव्हा चोरी

पिंपळे निलख | २९ सप्टेंबर २०२६ : इमारतीच्या पार्किंगमध्ये उभी केलेली २५ हजार रुपये किमतीची होंडा ॲक्टिव्हा अज्ञात चोरट्याने चोरून नेल्याची घटना पिंपळे निलख येथे घडली. याप्रकरणी सांगवी पोलीस ठाण्यात अज्ञात आरोपीविरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, प्रणव संजय शिंदे (वय २६, बाणेर, पुणे) यांनी फिर्याद दिली आहे.

फिर्यादी यांनी त्यांची २५ हजार रुपये किमतीची काळ्या रंगाची होंडा कंपनीची ॲक्टिव्हा 3G (MH 14 FE 3798) पिंपळे निलख येथील अक्षय नगर, डी.पी. रोड येथील पार्किंगमध्ये उभी केली होती.

२५ सप्टेंबर रोजी सायंकाळी साडेसहाच्या सुमारास दुचाकी पार्क करण्यात आली होती. त्यानंतर २६ सप्टेंबर रोजी सकाळी साडेनऊच्या सुमारास पाहिले असता दुचाकी पार्क केलेल्या ठिकाणी आढळून आली नाही. त्यानंतर शोध घेऊनही दुचाकी मिळाली नसल्याचे फिर्यादीत म्हटले आहे.

अज्ञात व्यक्तीने स्वतःच्या आर्थिक फायद्यासाठी आणि लबाडीच्या उद्देशाने दुचाकी चोरून नेल्याची तक्रार करण्यात आली आहे. याप्रकरणी सांगवी पोलीस ठाण्यात भारतीय न्याय संहितेच्या कलम ३०३(२) अंतर्गत गुन्हा दाखल करण्यात आला असून पुढील तपास सुरू आहे.