Sep 30 2026
एची-नागोया एशियाई क्रीडा स्पर्धेत भारतीय महिला कंपाऊंड तिरंदाजी संघाने सुवर्णपदक पटकावले. अंतिम सामन्यात भारताने चीनचा २३८-२३४ असा पराभव केला. सुवर्णपदक विजेत्या भारतीय संघात पिंपरी-चिंचवडच्या प्रिथिका प्रदीप हिच्यासह ज्योती सुरेखा वेन्नम आणि चिकिता तनीपार्थी यांचा समावेश होता.
भारतीय संघाने उपांत्य फेरीत दक्षिण कोरियावर २३४-२३३ अशी मात करत अंतिम फेरी गाठली होती. अंतिम लढतीत भारतीय तिरंदाजांनी अचूक निशाणा साधत चीनवर चार गुणांनी विजय मिळवला. भारताने नोंदवलेला २३८ गुणांचा स्कोअर दक्षिण कोरियाने २०१४ मध्ये नोंदवलेल्या जागतिक विक्रमाशी बरोबरी करणारा ठरल्याचे देण्यात आलेल्या माहितीत म्हटले आहे.
भारतीय महिला कंपाऊंड संघाने एशियाई क्रीडा स्पर्धेत सलग दुसऱ्यांदा सुवर्णपदक जिंकल्याचेही नमूद करण्यात आले आहे. ज्योती सुरेखा वेन्नम यांचे हे एशियाई क्रीडा स्पर्धेतील चौथे सुवर्णपदक असल्याचे, तर प्रिथिका प्रदीप आणि चिकिता तनीपार्थी यांनी पहिल्याच एशियाई क्रीडा स्पर्धेत सुवर्णपदक मिळवल्याचे सांगण्यात आले आहे.
पिंपरी-चिंचवडमधून घडलेल्या प्रिथिकाच्या या कामगिरीमुळे शहरातील धनुर्विद्या क्षेत्रात आनंदाचे वातावरण आहे. तिच्या यशामध्ये प्रशिक्षक कुणाल टावरे यांचे मार्गदर्शन आणि पालकांचे प्रोत्साहन महत्त्वपूर्ण ठरल्याचे सांगण्यात आले.
महाराष्ट्र धनुर्विद्या संघटनेच्या सहसचिव तथा पिंपरी-चिंचवड आर्चरी असोसिएशनच्या सचिव सोनल बुंदेले यांनी प्रिथिकाचे अभिनंदन केले. शालेय वयातच तिच्यातील गुणवत्ता ओळखली होती आणि तिची जिद्द, सातत्यपूर्ण मेहनत व खेळाप्रती निष्ठा आज सुवर्णपदकापर्यंत पोहोचल्याचे त्यांनी सांगितले.
May 12 2026
