Oct 02 2026
चिंचवड | १ ऑक्टोबर २०२६ : रस्त्याच्या कडेला पार्क केलेल्या फॉक्स वॅगन कारची कोयता आणि लोखंडी रॉडने तोडफोड करून २५ हजार रुपयांचे नुकसान केल्याची घटना चिंचवड येथे घडली. यावेळी उपस्थित नागरिकांना जीवे मारण्याची धमकी देऊन सार्वजनिक शांतता भंग केल्याचेही फिर्यादीत म्हटले आहे. याप्रकरणी पाच जणांविरोधात निगडी पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, ऋषिकेश संजय वराडी (वय २८, रा. रामेश्वर मंदिराजवळ, संभाजीनगर, चिंचवड, पुणे) यांनी फिर्याद दिली आहे.
याप्रकरणी नागेश चोपडे, अभिषेक यादव, अभिषेक गोसावी, सिद्धार्थ माने आणि त्यांचा एक साथीदार यांच्याविरोधात गुन्हा दाखल करण्यात आला आहे.
फिर्यादीनुसार, ३० सप्टेंबर रोजी सायंकाळी ५ वाजून २० मिनिटांच्या सुमारास वृंदावन सोसायटीसमोर, रामेश्वर मंदिराजवळ, चिंचवड येथे ही घटना घडली. आरोपींनी रस्त्याच्या कडेला पार्क केलेल्या फिर्यादीच्या फॉक्स वॅगन वेंटो कार क्रमांक MH-14-CS-1625 च्या पुढील काचेवर आणि बोनेटवर लोखंडी कोयता व लोखंडी रॉडने मारून तोडफोड केल्याचे फिर्यादीत नमूद आहे.
या तोडफोडीत कारचे अंदाजे २५ हजार रुपयांचे आर्थिक नुकसान झाले. तसेच आरोपींनी तेथे उपस्थित नागरिकांना जीवे मारण्याची धमकी देऊन सार्वजनिक शांतता भंग केली आणि परिसरात दहशतीचे वातावरण निर्माण केल्याचे फिर्यादीत म्हटले आहे.
याप्रकरणी निगडी पोलीस ठाण्यात भारतीय न्याय संहिता, भारतीय हत्यार कायदा, महाराष्ट्र पोलीस अधिनियम आणि क्रिमिनल अमेंडमेंट ॲक्टमधील संबंधित कलमांनुसार गुन्हा दाखल करण्यात आला असून पुढील तपास सुरू आहे.
May 12 2026
