निवडणूक आयोगाविरोधात पिंपरी-चिंचवड काँग्रेसचे निगडीत आंदोलन!

निगडी | २८ सप्टेंबर २०२६ : निवडणूक आयोगाच्या कारभारावर गंभीर आक्षेप घेत पिंपरी-चिंचवड शहर काँग्रेसच्या वतीने निगडी येथील अप्पर तहसीलदार कार्यालयासमोर आंदोलन करण्यात आले. काँग्रेसने या आंदोलनाला ‘मतचोरी देशद्रोही निषेध आंदोलन’ असे संबोधत मुख्य निवडणूक आयुक्त ज्ञानेश कुमार यांना पदावरून हटवून अटक करावी, तसेच त्यांच्या कार्यकाळातील निर्णयांची पडताळणी करावी, अशी मागणी केली. याबाबत अप्पर तहसीलदार जयराज देशमुख यांना निवेदन देण्यात आले.

या आंदोलनाच्या पार्श्वभूमीवर द इंडियन एक्सप्रेसने केलेल्या तपासात निवडणूक आयुक्त सुखबीर सिंह संधू आणि विवेक जोशी यांनी गेल्या दहा महिन्यांत किमान १४ वेळा आयोगातील विविध निर्णयांवर अधिकृत आक्षेप नोंदवल्याचे समोर आले आहे. या आक्षेपांमध्ये नवीन मतदारांची नोंदणी, नावे वगळणे, Form 6 मधील बदल आणि मतदार यादीशी संबंधित आयटी प्रणालीच्या केंद्रीकरणासारख्या मुद्द्यांचा समावेश आहे.

मात्र, निवडणूक आयोगाच्या अधिकाऱ्यांनी अंतर्गत मतभेदांबाबतच्या वृत्तानंतर SIRसह आयोगाचे निर्णय तिन्ही आयुक्तांच्या मान्यतेने झाल्याची भूमिका मांडली होती. त्यामुळे काँग्रेसने आंदोलनात केलेले ‘मतचोरी’, ‘निवडणूक निकाल बदलले’ आणि ‘देशद्रोह’ यांसारखे आरोप हे पक्षाचे राजकीय आरोप असून ते स्वतंत्रपणे सिद्ध झालेले निष्कर्ष म्हणून पाहता येत नाहीत.

आंदोलनावेळी शहराध्यक्ष नरेंद्र बनसोडे यांनी मुख्य निवडणूक आयुक्तांवर टीका करत त्यांच्या बडतर्फी आणि अटकेची मागणी केली. राहुल गांधी यांनी यापूर्वी निवडणूक आयोगाबाबत उपस्थित केलेल्या मुद्द्यांना संबंधित वृत्तामुळे पुष्टी मिळाल्याचा दावाही बनसोडे यांनी केला.

आंदोलनात महाराष्ट्र प्रदेश काँग्रेस कमिटीचे सचिव अशोक मोरे, मानव कांबळे, अभिमन्यू दहीतुले, सतीश काळे, धनाजी येळकर पाटील, शहाबुद्दीन शेख, विशाल जाधव, राहुल शिंपले, सूरज गायकवाड, पांडुरंग जगताप यांच्यासह काँग्रेस आणि विविध संघटनांचे पदाधिकारी व कार्यकर्ते सहभागी झाले होते.