Jun 25 2026
7केतनचा खून खटला जलदगतीने चालविण्यात यावा, अग्रवाल कुटुंबियांची मागणी
पुणे, ता. २४ - युवा उद्योजक केतन अग्रवाल याच्या खून प्रकरणाचा खटला जलदगतीने न्यायालयात चालवावा, अशी मागणी अग्रवाल कुटुंबीयांनी पत्रकारांशी बोलताना केली आहे.
पुण्यातील उद्योजक विशाल अग्रवाल यांचा मुलगा केतन अग्रवाल याचा त्याच्या होणाऱ्या पत्नीने खून केल्याचे उघड झाले आहे. केतनची होणारी पत्नी सिया गोयल व तिचा प्रियकर चेतन चौधरी यांना पोलिसांनी अटक केली आहे. केतनच्या वडीलांनी पुणे ग्रामीण पोलिसांची भेट घेतली. यावेळी त्यांनी पत्रकारांशी बातचीत केली.
ते म्हणाले, ''आरोपी सिया गोयलच्या कुटुंबीयांना आम्ही अनेक वर्षांपासून ओळखतो. केतन आणि सियाचा विवाह मध्यस्थीने निश्चित करण्यात आला होता. मध्यस्थी करणाऱ्या कुटुंबीयांचा आमचा परिचय आहे. मात्र, अशा प्रकारचा दगाफटका होईल, असे आम्हाला वाटले नव्हते. आम्ही एकुलता एक मुलगा गमावला. आरोपींना कठोर शिक्षा देण्यासाठी पोलिसांनी प्रयत्न करावेत. पोलिसांनी सक्षमपणे न्यायालयात बाजू मांडावी. खून खटला जलदगतीने चालविण्यात यावा. ''
Jun 25 2026
