Sep 26 2026
महाळुंगे | २५ सप्टेंबर २०२६ : मजुरी करणाऱ्या ३८ वर्षीय व्यक्तीला शिवीगाळ करत लाथाबुक्क्यांनी मारहाण केल्यानंतर काळ्या रंगाच्या केबलने उजव्या हाताच्या पंजावर जोरात मारल्याची घटना महाळुंगे परिसरात घडली. या मारहाणीत फिर्यादीच्या अंगठ्याजवळील बोटाला जखम होऊन फ्रॅक्चर झाले असून पुढील बाजूचा एक दातही पडल्याचे फिर्यादीत म्हटले आहे.
पोलिसांनी दिलेल्या माहितीनुसार, शामसुंदर राधापद मंडल (वय ३८, रा. एम. पार्ककडची वाडी, ता. खेड, जि. पुणे; मूळ रा. कुलीयाथाना, बादुरिया, जि. नॉर्थ २४ परगणा, पश्चिम बंगाल) यांनी फिर्याद दिली आहे.
ही घटना २२ सप्टेंबर रोजी सायंकाळी साडेचारच्या सुमारास मौजे महाळुंगे गावच्या हद्दीतील दवणे वस्ती येथे, द्वारका स्कूलच्या पाठीमागे रस्त्याच्या कडेला असलेल्या जिलेबी दुकानाजवळ घडली.
याप्रकरणी कपिल रणवीर दहिया (वय ३०, रा. द्वारका सिटी जवळ, महाळुंगे, ता. खेड, जि. पुणे) आणि एका अनोळखी व्यक्तीविरोधात गुन्हा दाखल करण्यात आला आहे.
फिर्यादीच्या म्हणण्यानुसार, आरोपींनी त्यांना शिवीगाळ करून लाथाबुक्क्यांनी मारहाण केली. त्यानंतर अनोळखी आरोपीने काळ्या रंगाची केबल वापरून फिर्यादीच्या उजव्या हाताच्या पंजावर जोरात मारले. त्यामुळे अंगठ्याजवळील बोटाला जखम होऊन फ्रॅक्चर झाले. तसेच मारहाणीत फिर्यादीच्या पुढील बाजूचा एक दात पडल्याचे तक्रारीत नमूद करण्यात आले आहे.
याप्रकरणी उत्तर महाळुंगे पोलीस ठाण्यात भारतीय न्याय संहितेच्या संबंधित कलमांनुसार गुन्हा दाखल करण्यात आला असून पोलीस पुढील तपास करत आहेत.
May 12 2026
