महापौर रवी लांडगे यांची आकाशवाणी पुणे केंद्राला सदिच्छा भेट........ भेटीदरम्यान झालेली महापौरांची मुलाखत उद्या (ता. २२) आकाशवाणीच्या पुणे 'अ' केंद्रावरून प्रसारित होणार

महापौर रवी लांडगे यांची आकाशवाणी पुणे केंद्राला सदिच्छा भेट

भेटीदरम्यान झालेली महापौरांची मुलाखत उद्या (ता. २२) आकाशवाणीच्या पुणे 'अ' केंद्रावरून प्रसारित होणार

पिंपरी, ता. २१ - पिंपरी-चिंचवडचे महापौर रवी लांडगे यांनी नुकतीच आकाशवाणी पुणे केंद्राला सदिच्छा भेट दिली. या सदिच्छा भेटीत आकाशवाणी पुणे 'अ' केंद्र आणि विविध भारती या दोन्ही स्टुडिओंद्वारे कशाप्रकारे कामकाज चालते याबाबत त्यांनी माहिती घेतली. यावेळी महापौर लांडगे यांची पिंपरी-चिंचवड महापालिकेच्या कामकाजाबाबत मुलाखत झाली. या मुलाखतीचे प्रसारण बुधवारी (ता. २२) सकाळी १०.१० वाजता आकाशवाणीच्या पुणे 'अ' केंद्रावरुन होणार आहे.

या सदिच्छा भेटीदरम्यान महापौरांनी आकाशवाणीच्या अभियांत्रिकी विभागाचे उपमहासंचालक अधीर गडपाले व प्रादेशिक वृत्त विभागाचे सहाय्यक संचालक माधव जायभाये यांच्याशी चर्चा करुन आकाशवाणी पुणे केंद्राची ऐतिहासिक पार्श्वभूमी, या केंद्राद्वारे प्रसारित होणारे कार्यक्रमांचे स्वरुप तसेच प्रादेशिक वृत्त विभागाद्वारे प्रसारित होणारी विविध बातमीपत्र आणि वृत्तविषयक कार्यक्रम आदींबाबत सविस्तर माहिती जाणून घेतली. लोकप्रतिनिधी आणि प्रशासनाचे कामकाज जनसामान्यांपर्यंत पोहोचवण्यामध्ये आकाशवाणीची भूमिका अतिशय महत्त्वपूर्ण आहे, असे सांगत पंतप्रधान नरेंद्र मोदी यांचा आकाशवाणीवरुन प्रसारित होणारा 'मन की बात' हा कार्यक्रम, आकाशवाणीच्या बातम्या, शेतकऱ्यांसाठीचे व कामगारांसाठीचे तसेच महिलाविषयक कार्यक्रम, साप्ताहिक कीर्तनाचा कार्यक्रम आदी उपक्रमांबद्दल महापौर लांडगे यांनी समाधान व्यक्त केले.

या प्रसंगी प्रादेशिक वृत्त विभागातील हंगामी वृत्त निवेदक योगेश रांगणेकर यांनी महापौर रवी लांडगे यांची पिंपरी-चिंचवड महानगरपालिकेच्या कामकाजा संदर्भात मुलाखत घेतली. ही मुलाखत बुधवारी सकाळी दहा वाजून दहा मिनिटांनी आकाशवाणीच्या पुणे अ केंद्रावरुन प्रसारित होईल व युट्यूब वाहिनीवरही प्रसारित केली जाईल. आकाशवाणी पुणे केंद्राला सदिच्छा भेट हा एक संस्मरणीय क्षण असल्याची भावना महापौर लांडगे यांनी व्यक्त केली.