Sep 23 2026
दिघी | 22 सप्टेंबर 2026 : कोणताही परवाना नसताना पिस्तूल, मॅगझिन आणि दोन जिवंत काडतुसे बाळगल्याप्रकरणी खंडणी विरोधी पथकाने 26 वर्षीय तरुणाला अटक केली. त्याच्याकडून एकूण 53 हजार रुपये किमतीचा शस्त्रसाठा जप्त करण्यात आला असून या प्रकरणातील आणखी एका साथीदाराचा पोलीस शोध घेत आहेत.
पोलिसांनी दिलेल्या माहितीनुसार, राहुल रमेश चव्हाण (वय 26, रा. भारतमातानगर, कॉलनी नं. 2, दिघी, पुणे) असे अटक आरोपीचे नाव आहे. ‘पाजी’ नावाच्या मध्य प्रदेशातील व्यक्तीचा पोलीस शोध घेत आहेत.
22 सप्टेंबर रोजी सकाळी साडेसातच्या सुमारास पठारे मळा, 90 फुटी रोड, म्हसोबा देवस्थानासमोरील मोकळ्या जागेत, चऱ्होली बुद्रुक येथे कारवाई करण्यात आली.
आरोपीकडून 50 हजार रुपये किमतीचे एक लोखंडी पिस्तूल, 2 हजार रुपये किमतीचे एक मॅगझिन आणि एक हजार रुपये किमतीचे दोन जिवंत राऊंड, असा एकूण 53 हजार रुपयांचा मुद्देमाल जप्त करण्यात आला. हा शस्त्रसाठा कोणत्याही परवान्याशिवाय बाळगण्यात आल्याचे पोलिसांनी म्हटले आहे.
पिंपरी-चिंचवड पोलीस आयुक्तालयाच्या हद्दीत 16 ते 29 सप्टेंबरदरम्यान लागू असलेल्या शस्त्रबंदी आदेशाचे उल्लंघन झाल्याचेही पोलिसांच्या नोंदीत नमूद आहे.
May 12 2026
