महापालिकेची स्थायी समिती सभा लाईव्ह प्रक्षेपित करा, शिवशाही शासन पक्षाचे प्रमुख युवराज दाखले यांची मागणी

महापालिकेची स्थायी समिती सभा लाईव्ह प्रक्षेपित करा, शिवशाही शासन पक्षाचे प्रमुख युवराज दाखले यांची मागणी 

पिंपरी, ता. १६ - पिंपरी-चिंचवड महानगरपालिकेच्या स्थायी समिती सभा या शहराच्या विकासाचा कणा आहेत. कोट्यवधी रुपयांच्या टेंडर, विकासकामे, करवाढ यांसारखे महत्वाचे निर्णय याच सभेत होतात. मात्र, या सभा बंद दाराआड होत असल्याने जनतेच्या पैशाचा पारदर्शक हिशोब होत नाही. ही परिस्थिती बदलायची असेल तर महापालिकेची प्रत्येक सभा लाईव्ह प्रक्षेपित करावी, अशी मागणी शिवशाही शासन पक्षाचे संस्थापक प्रमुख लोकसेवक युवराज भगवान दाखले यांनी महापालिका प्रशासनाकडे केली आहे.

युवराज दाखले म्हणाले,  "पिंपरी-चिंचवडची लोकसंख्या 20 लाखांपेक्षा जास्त आहे. स्थायी समितीमध्ये शेकडो कोटींचे निर्णय होतात. कोणते काम कोणाला, किती दराने, कशा अटींवर दिले जाते हे नागरिकांना कळलेच पाहिजे.  डॉ. बाबासाहेब आंबेडकर म्हणायचे - 'पारदर्शकता नसलेली लोकशाही ही अंधारकोठडी आहे.' आज मुंबई BMC, पुणे PMC, नवी मुंबई NMMC मध्ये स्थायी समिती लाईव्ह होते. मग पिंपरी-चिंचवड मागे का? बंद दाराआडच भ्रष्टाचार फोफावतो. सभा लाईव्ह झाली की नगरसेवकही जबाबदारीने बोलतील आणि कामेही दर्जेदार होतील."

"जनतेच्या पैशावर डल्ला मारणाऱ्या प्रवृत्तींना लाईव्ह प्रक्षेपण नको असते. जर महापालिका प्रशासनाने ही मागणी मान्य केली नाही, तर शिवशाही शासन पक्ष महापालिका मुख्यालयासमोर 'पारदर्शकता सत्याग्रह' आंदोलन करेल.", असा इशारा युवराज दाखले यांनी दिला आहे.

शिवशाही शासन पक्षाच्या प्रमुख मागण्या अशा - 

1. थेट प्रक्षेपण: पुढील सभेपासून स्थायी समितीची सभा महापालिकेच्या अधिकृत YouTube/Facebook चॅनेलवर लाईव्ह करावी.

2. रेकॉर्डिंग सेव्ह: सभेचे संपूर्ण रेकॉर्डिंग महापालिका वेबसाईटवर 5 वर्षे उपलब्ध ठेवावे. 

3. नागरिक सहभाग: सभेपूर्वी नागरिकांना ऑनलाइन प्रश्न/सूचना पाठवण्याची सुविधा द्यावी.

4. आयुक्तांचा आदेश: आयुक्तांनी तातडीने आदेश काढून अंमलबजावणी करावी.